Banco Pastor

1974 Este año recordarase porque o presidente de Estados Unidos, Richard Nixon, renuncia,  publicamente por televisión, como resultado do escándalo Watergate. Ao día seguinte é sustituido polo entón vicepresidente Gerald Ford.  É o ano en que a poboación mundial alcanza os 4.000 millóns de persoas, e Banco Pastor abre a súa primeira oficina en Barcelona, un ano despois faino en París.

1978 O 1 de novembro, Banco Pastor implanta o seu servizo de tarxetas de crédito.

A historia das tarxetas de crédito comezara uns anos antes, e non con American Express, Visa, MasterCard, senón con Frank X. McNamara e dous dos seus amigos.
En 1949, Frank X. McNamara, líder da Hamilton Credit Corporation, vai cear con Alfred Bloomingdale, un grande amigo de McNamara e neto do fundador da tenda de Bloomingdale, e Ralph Sneider, o avogado de McNamara. Os tres homes citáranse nun restaurante famoso de Nova York ubicado xunto ao Empire State.
Os problemas dos clientes centran a conversa. Ao remataren a cea, McNamara busca a súa billeteira para pagar a comida en efectivo. Ao descubrir que non ten cartos veuse na obriga de chamar á súa dona para que se achegase a pagar a comida. McNamara promete que pensará algunha solución para que iso non volvese suceder. Fusionando dous conceptos desa cea, un problema dun cliente verbo dos préstamos sen fraude de tarxetas individuais que ofrecían algúns comercios e o feito de non ter cartos en efectivo para pagar a comida, a McNamara se lle ocorre unha evolucionada idea: unha tarxeta de crédito que poida ser empregada en localidades múltiples. O que é completamente novo neste concepto é que iría haber un intermediario entre as empresas e os seus clientes.
Despois de discutir, con Bloomingdale e con Sneider, a idea dunha única tarxeta para todos os comercios e non unha para cada un, os tres xuntan algún diñeiro e crean unha empresa en 1950, á que chaman “Diners Club”.

O Diners Club actuaría como intermediario. En vez de empresas individuais que ofrecesen créditos aos seus propios clientes (os cales ían ter que pagar máis tarde), o Diners Club tiña como obxectivo ofrecer créditos a persoas para varias empresas (logo, cobraría aos clientes e pagaría ás empresas).

1986 O economista estadounidense, Hyman Minsky, publica a súa obra mestra Estabilizando unha inestable economía.

José María Arias, presidente de Banco Pastor dende 2001, citaríao nun discurso pronunciado en 2008 diante de 400 empresarios no Clube Financeiro da Coruña. As súas palabras foron: “A innovación financeira é inevitable, mais a lección aprendida -a raíz da crise americana das hipotecas subprime e a caída dos Bancos de Investimento- é que esta innovación, xunto á perda de aversión ao risco, non nos debe volver levar a conceder créditos aumentando o valor da garantía sen unha base real. Como dicía o criticado, pero visionario, Hyman Minsky en 1986 na súa obra mestra Estabilizando unha inestable economía: un longo período de rápido crecemento, baixa inflación, baixos tipos de xuro e estabilidade macroeconómica producen unha crecente compracencia diante da toma de risco. Isto, por simple que pareza, é o que ocorreu”.

En 1986, Banco Pastor presenta o seu novo símbolo de identidade corporativa, o cal se mantén ata a data.

1989 A banca española designa ao profesor D. Ángel Latorre Segura como Defensor do Cliente dos Bancos, figura que podía intervir exclusivamente naquelas reclamacións por contía inferior a 10 millóns de pesetas.
O Consello de Administración de Banco Pastor aproba un novo Plan Estratéxico para a entidade, co obxectivo fundamental de potenciar aínda máis a orientación comercial do Banco, achegar os Servizos Centrais ao mercado e mellorar o nivel de servizo ofrecido aos diferentes segmentos de clientela.
Nace a Libreta Plus de Banco Pastor, cunha remuneración moi superior ás cartillas de aforro ordinario, coa vantaxe de que esta aumenta en función do saldo medio que o cliente decida manter, e ademais total dispoñibilidade.

1993 Asínase en Washington a Declaración de Principios para a autonomía de Gaza e Jericó, tras os acordos de Oslo; Isaac Rabin e Yaser Arafat danse a man. Banco Pastor implementa o servizo telefónico de Liña Pastor, coa finalidade fundamental de proporcionar aos clientes, de calquera das oficinas de Banco Pastor, a posibilidade de realizar consultas ou determinadas transaccións bancarias por teléfono, cun horario máis amplo que o establecido para a apertura de oficinas cara ao público.